Wahubiri waliopigwa marufuku Msikitini Al‑Aqsa wakaidi amri ya Israel
Mamlaka za Israel siku ya Jumatatu zilitangaza marufuku hiyo ya wiki moja dhidi ya wahubiri hao wawili mashuhuri wa Kiislamu wa Kipalestina, hatua inayowazuia kuingia katika Msikiti wa Al‑Aqsa ulioko katika mji wa Mashariki mwa al‑Quds ulio chini ya uvamizi.
Katika taarifa tofauti, wote wawili walisema waliitwa kwa ajili ya mahojiano na baadaye wakakabidhiwa amri ya marufuku hiyo.
“Tulipokea amri inayotuzuia kuingia Msikiti wa Al‑Aqsa,” Sheikh Salah aliwaambia wanahabari. “Tulipoulizwa tunasemaje kuhusu hilo, tulijibu kuwa Al‑Aqsa ni haki ya Kiislamu peke yake na tuna haki ya kuwepo humo.”
Aliitaja marufuku hiyo kuwa “si halali,” “si ya haki,” na pia “shambulio dhidi ya dini yetu” pamoja na “dhuluma ya kidini,” akisisitiza kuwa Waqf wa Kiislamu wa al‑Quds ndio wenye mamlaka ya pekee juu ya eneo hilo takatifu.
Kwa upande wake, Sheikh al‑Khatib alisema kuna uwezekano marufuku hiyo ikaongezwa muda wake.
“Ni wazi kwamba Jumapili ijayo kutakuwa na uamuzi wa kuiongeza marufuku hii hadi miezi sita na kamanda wa polisi wa wilaya ya Jerusalem,” alionya. “Msikiti wa Al‑Aqsa ni mali ya Waislamu, na hakuna mtu mwingine mwenye haki hata ya chembe ya udongo wake.”
Msikiti wa Al‑Aqsa ni eneo la tatu kwa utakatifu kwa Waislamu duniani. Wayahudi huiita sehemu hiyo Mlima wa Hekalu (Temple Mount), wakidai kuwa hapo ndipo zilipokuwa hekalu mbili za kale za Kiyahudi. Mamlaka za Israel zimeripotiwa kutoa mamia ya amri kama hizi mwaka huu dhidi ya wanazuoni wa dini na waumini, ambazo mara nyingi huanza kwa marufuku ya wiki moja na zinaweza kuongezwa hadi miezi sita.
Sheikh Raed Salah hapo awali alikuwa kiongozi wa Harakati ya Kiislamu katika Palestina iliyokaliwa, huku Sheikh Kamal al‑Khatib akiwa naibu wake hadi pale Israel ilipopiga marufuku harakati hiyo mwezi Novemba 2015 kwa madai ya uchochezi. Hapo awali pia mamlaka za Israel zilikuwa zimemwekea Sheikh Salah marufuku ya miaka 15 ya kuingia katika Msikiti wa Al‑Aqsa, marufuku ambayo ilimalizika mwaka 2022.
3497262
